Unións Agrarias - UPA

A orde de axudas por ataque do xabarín recolle a proposta de Unións de pagarlle tamén 1.200 euros aos gandeiros que superen este tope de danos

A nova orde de axudas polo que se indemniza aos gandeiros e agricultores polo ataque do xabaril recolle unha modificación que propuxo Unións Agrarias: os afectados que superen os 1.200 euros en perdas terán dereito a esta indemnización, a máxima que otorga a Consellería de Medio Ambiente. Ata a inclusión desta modificación na orde publicada no Diario Oficial de Galicia o pasado día 18, os afectados con perdas superiores non cobraban nada e tiñan que acudir ao xulgado e presentar un contencioso para reclamarlle danos e prexuizos ao Tecor (terreos cinexéticos ordenados), cos conseguintes gastos económicos para o gandeiro ou agricultor e a prolongación dun proceso do que o damnificado non sabía o resultado en meses.

Unións Agrarias califica a medida de Medio Ambiente de positiva porque lle permite aos máximos afectados cobrar unha primeira compensación, á espera de que os posibles xuízos prosperen. Pero tamén cre que se deben dar pasos para evitar que os gandeiros e agricultores teñan que enfrontarse a un proceso xudicial diante dos tecores. Así, o sindicato propúxolle á Consellería de Medio Ambiente a reforma da actual orde para que os afectados non teñan que ir a xuizo e cobren no menor tempo posible as indemnizacións íntegras e axustadas ás perdas.

Outra das medidas demandadas polo sindicato é que Medio Ambiente exerza un maior control sobre os tecores coa fin de que estabilicen a poboación de xabarín. UUAA constatou en varias zonas que os ataques se producen de forma proporcional á proliferación da especie. Por iso, Unións Agrarias solicitoulle a Medio Ambiente que incremente as batidas para reducir a presión que exercen estas especies na agricultura e gandeiría naqueles lugares onde haxa problemas.

Nesta mesma liña de traballo, o sindicato puxo enriba da mesa a necesidade de incrementar os traballos de limpeza e desbroce naquelas zonas de maior presencia de xabarín para reducir as súas zonas de influencia.