17/02/2013
ULEGA PRESENTA O SEU MODELO DE CONTRATO LACTEO
A Unión Leiteira Galega, (ULEGA) vén de presentar na mañá de hoxe en Lugo o modelo de contrato que esta organización de produtores lácteos propón para equilibrar a cadea de valor neste sector e poñer fin a posición dominante de industria e distribución na mesma. Un formato contractual que recolle as bases elaboradas e aprobadas pola INLAC.
ULEGA reuniu hoxe aos representantes da súas xuntas territoriais na provincia de Lugo que en conxunto agrupan a uns 800 gandeiros cunha produción global de arredor de 175 toneladas de leite. No encontro cos responsables das catro comarcas luguesas o presidente de ULEGA, Xosé Vence, anunciou que se lle trasladou aos órganos inspectores do Ministerio de Agricultura un informe no que se recollen diversos modelos de contratos inzados de cláusulas abusivas que determinadas industrias están poñendo a sinatura dos gandeiros
No articulado do contrato lácteo presentado, destacan a duración que se fixa nun ano para poder dar estabilidade nas ventas as granxas. Tamén se rexistra que o prezo fixado para o leite debe de estar referenciado a un índice elaborado pola INLAC no que se teñan en conta diferentes imputs como as variacións nos custes de produción froito da volatibidade de determinado insumos como os pensos, a enerxía ou os fertilizantes. No modelo contractual hoxe presentado, elimínanse as cláusulas abusivas que as industrias impoñen aos gandeiros, como as penalizacións por sobreprodución. Neste sentido desde ULEGA proponse que se tome o volume de entrega da campaña anterior cunha tolerancia razoable na variación das entregas.
No marco deste encontro no que participou o secretario Xeral de UUAA, Roberto García, analizáronse os contidos do proxecto de Lei da Cadea Alimentaria que se deu a coñecer na pasada semana e que se atopa en tramitación parlamentaria. Tódolos asistentes coincidiron en sinalar das graves deficiencias que atopan nos apartados referidos ao sector lácteo. Destacando a ausencia da figura do mediador que arbitre nas relacións comerciais entre gandeiros e industria e tamén falta de interese que se percibe no articulado do borrador da nova lei para poñer fin a venta a perdas. Finalmente, ULEGA súmase a demanda das organizacións agrarias no canto de pedir unha reunión co presidente da Xunta de Galicia para coñecer a súa posición ante o claro incumprimento dos acordos recollidos no protocolo asinado o pasado 7 de decembro.
|
