A aula de formación de UGT en Lalín acolle este venres unha charla para desvelar as evidencias e as incertezas que o cambio climático está a provocar no subsector gandeiro galego e difundir sistemas de xestión, así como o manexo dunha serie de estratexias de mitigación e adaptación do subsector gandeiro ante o cambio climático.

A xornada desenvolveuse esta mañá coa sucesión dunha serie de relatorios, nos que se puxeron sobre a mesa diversas consideracións sobre as repercusións do cambio climático no subsector gandeiro, ademais de propor unha serie de estratexias de mitigación e adaptación deste sector ao cambio climático.

Así mesmo, abordouse o aproveitamento da enerxía solar a través de instalacións de paneis fotovoltaicos ou placas solares nos tellados de explotacións gandeiras e agrícolas.

Finalmente, abriuse unha mesa redonda, na que os participantes achegaron os seus puntos de vista sobre as melloras de xestión e manexo no subsector fronte ao cambio climático.

O programa comprende tamén unha exposición itinerante informativa, para dar a coñecer a incidencia do cambio climático nos hábitats ligados ao sector agroforestal galego e cultivos máis sensibles, ademais do buzón de suxestións Ecobuzón, onde se poden realizar consultas, suxestións e propostas.