Unións Agrarias lamenta as falsas liortas entre industrias lácteas para manter a especulación na distribución, nun momento no que en toda Europa se está a dar unha conxuntura claramente alcista para o prezo do leite e os seus derivados.

Na nova entrega desta guerra entre industrias por acadar cota de mercado a calquera prezo, os gandeiros galegos están sometidos actualmente a unha situación de prezos de mercado baixos, inferiores ao que custa producir, unha situación que está afectando á viabilidade do sector e comprometendo seriamente o seu futuro, guerra soamente na venda de produto, non así no abastecemento.

Neste sentido, desde o sindicato vese con gran tristeza e decepción como Alimentos Lácteos de Galicia parece terse incorporado ao grupo de empresas que teñen como única política comercial baixar o prezo do leite e polo tanto banalizar o produto diante da distribución. Ese camiño curtopracista ten demostrado ser letal para os produtores, pero a medio prazo tamén para as industrias, que se verán atrapadas pola inercia baixista.

Esta realidade vénse sumar a outras claras actuacións de abuso de poder cara ao colectivo de produtores de leite consistentes en ameazas de deixar liñas de recollida de leite, atrasos nos pagamentos, repartimento das rutas, preferencia polo leite foráneo, incumprimento permanente dos acordos por parte da industria e a distribución, etc.

Desde UUAA reiteramos que, a pesar das medidas para mellorar a transparencia da cadea de valor, continúa existindo un importante desequilibrio na cadea láctea, de forma que o poder de negociación dos produtores se atopa practicamente anulado.

Isto tradúcese nunha gran debilidade do primeiro elo da cadea que impide unha mellor redistribución do beneficio no conxunto da cadea de valor e a consolidación de prácticas de abuso de poder nas negociacións.