Unións Agrarias, diante das informacións coñecidas na tarde de hoxe a través do medios de comunicación, manifesta o seu asombro pola absoluta falta de respecto que amosa o Partido Popular cara á xustiza, xa que na súa teima de manter artificiosamente a sarta de mentiras que vén vertendo desde hai un mes sobre o sindicato, chega a anunciar unha denuncia sen sequera concretar contra quen.

O sindicato constata que o anuncio desta tarde é unha proba clara da sintonía entre o Partido Popular e os equipos de investigadores da Consellería de Presidencia que, encabezados por Alfonso Rueda, e con formas do antigo Tribunal de Orden Público, perseguiron e presionaron a agricultores e gandeiros ao longo destes días para extraer das declaracións argumentos para a súa farsa xudicial.

Unións Agrarias reitera a súa confianza na xustiza, porque sabe que nese marco se van ver salvagardos os seus dereitos, e nese sentido lémbralle ao Partido Popular e ós artífices da campaña de difamación que veu sufrindo a organización nestes días, que as falsas denuncias non as ampara a actividade política e que o abuso de poder por parte de funcionarios públicos é un delito penado.

Finalmente, a organización sindical manifesta a súa sorpresa polo feito de que esa denuncia contra ninguén será presentada no xulgado de Corcubión, cando os ámbitos para xulgar os principais destinatarios das súas acusacións -e segundo Miranda, “cerebros da trama”-, Pablo García e Ricardo Varela, deberían ser, como aforados que son, o Tribunal Supremo no primeiro caso e o Tribunal Supremo de Xustiza de Galicia  no segundo.