O sindicato Unións Agrarias iniciará estes días unha campaña de recollida de sinaturas entre os viticultores da provincia de Ourense para solicitar que a Xunta de Galicia convoque con carácter urxente a  Mesa do Viño ante o inminente inicio da vendima deste ano.

Neste sentido, a organización sindical lembra que o 70 % da uva da Denominación de Orixe do Ribeiro non está amparada en contratos, unha situación que introduce un factor de inestabilidade grave para os colleiteiros, que ven como a súa produción, malia contar con boas expectativas e prezos, queda exclusivamente en mans dos adegueiros. Esta situación contrasta co compromiso adquirido pola actual Consellería do Medio Rural a favor dos contratos homologados neste sector.

Unións Agrarias denuncia ademais a pasividade do Executivo galego neste asunto, xa que desde que asumiu o Goberno da Xunta de Galicia non procedeu a convocatoria deste órgano, sendo a última ocasión na que se reuniu baixo o Executivo bipartito.