O sindicato Unións Agrarias vén de dirixirse por carta á Consellería do Medio Rural para solicitar unha reunión co director xeral de Produción Agropecuaria, José Álvarez Robledo, co fin de expoñerlle as consecuencias que están a sufrir as explotacións gandeiras galegas derivadas dos posibles efectos secundarios da vacinación da lingua azul.

A organización sindical fai esta petición despois de recoller repetidas queixas por parte dos gandeiros que están a acusar un maior número de mortes dos animais despois de que se proceda á vacinación dos mesmos como medida preventiva para esta enfermidade. Segundo os datos que manexa o sindicato, distintas explotacións das comarcas das provincias da Coruña e Lugo sufriron a perda de animais así como un gran número de abortos incluso meses despois de que seren vacinados contra esta enfermidade.

Neste sentido, Unións Agrarias demanda que se abra unha investigación por parte da Administración autonómica co fin de aclarar estas circunstancias, ademais de que se extremen as medidas de seguridade e salubridade neste tipo de campañas. Do mesmo xeito, a organización sindical solicita que os actuais seguros gandeiros cubran estas perdas ou que se habilite algún tipo de fondo de compensación para gandeiros de cara a cubrir a perda de rendibilidade ocasionada por estes efectos colaterais da campaña de vacinación de lingua azul.