Unións Agrarias lembra aos agricultores, gandeiros, profesionais do agro e propietarios de hortas familiares do rural galego, que ante o inicio da campaña de sementeira do millo e de horta, -tarefas que se multiplicarán nos próximos días co cese das choivas- poden solicitar caza para evitar danos, a pesares de estarmos en período de veda de caza do xabaril. Deste xeito, calquera afectado por danos ten dereito a solicitar do TECOR da súa zona, medidas extraordinarias para o control dos mesmos, sexan accións con cans, esperas selectivas, ou directamente batidas nos casos máis graves.
Unións Agrarias está a detectar en varias comarcas galegas, intentos de desinformación por parte de distintos responsables de TECOR e Sociedades de Caza, que alegan a imposibilidade de realizar accións de caza ata a apertura da veda a principios de setembro. O cal é rotundamente falso. Ante este intento claro de desinformación, Unións lembra que a Lei ampara aos afectados polos danos do xabaril, e que a Xunta de Galicia si pode autorizar estas medidas extraordianarias en veda, sempre e cando haxa constancia oficial da existencia de danos. Por elo Unións lembra, a conveniencia de dar parte dos danos no teléfono 112, para que consten oficialmente, e que a Consellería de Medio Ambiente á vista dos informes dos axentes, poida autorizar conforme á Lei de Caza de Galicia, estas medidas de control, que permitan o normal desenvolvemento da campaña de sementeira.
A campaña de sementeira do millo vai implicar unhas 65.000 ha en Galicia nas próximas semanas. Sendo o custe de alimentación máis da metade dos gastos dunha explotación tipo de leite ou carne, é fundamental a colleita de millo forraxeiro para garantir a viabilidade económica das explotacións galegas, nas que os danos do xabaril moitas veces supón sobrecustes inadmisibles de ata o 20% para as explotacións, as que se aboca ao peche. O xabaril está a botar familias do agro galego.
Hai comarcas enteiras de Galicia que non poden sementar este cultivo, e moitas outras onde os produtores sementan ou encargan o silo de millo incluso fora de Galicia, ante a imposibilidade de garantir un resultado normal da colleita. O que supón perdas económicas e abandono de terreos cultivados, que pasan a engrosar o problema dos incendios forestais. Ante a constatación do fracaso do modelo actual de control das poboacións do xabaril, e dos danos que traen, Unións Agrarias demanda un novo “pacto social” no que haxa un compromiso de protexer ao rural galego dos efectos da proliferación desordenada das poboacións do xabaril, a través do control da especie, e se comprometa igualmente a compensar económicamente os danos a quen os sufre cando estes se produzan.
