O anuncio da Consellería do Medio Rural da próxima publicación no DOG da infestación da produción de pataca pola couza guatemalteca en parroquias de Laracha e Carballo fai saltar todas as alarmas no sector polo risco que supón para unha das zonas produtivas de maior calidade dentro da IXP Pataca de Galicia.
Desde a organización agraria laméntase que a extitular da Consellería de Medio Rural, Ángeles Vázquez, se entregara a un triunfalismo sen bases sólidas para afirmar a total erradicación da praga coa ansia propagandística de tapar os problemas con anuncios baleiros de contido, como no caso do xabaril, a vespiña do castaño.
Tal como xa advertira Unións Agrarias, a falta dun orzamento que garantise a cobertura do lucro cesante das explotacións de autoconsumo que vían pechada a posibilidade de sementar ía a traer consigo que se deran fugas nos pretendidos illamentos das zonas afectadas pola praga, tal como ocurreu.
A proximidade dos novos brotes á zona de Coristanco pon en grave risco un sector que é un puntal económico na comarca e unha das principais fontes de emprego na zona de Bergantiños.
UUAA pide a convocatoria inmediata da Mesa da pataca de Galicia para que se informe ao sector e se poña en marcha un plan ordenado e serio para unha erradicación real da couza guatemalteca. Para a organización agraria non é de recibo que os produtores só poidan coñecer a situación a través dos medios de comunicación e non dunha fonte directa da administración.
