Martes 10 de marzo de 2020. De 11 a 14 horas. Praza de Atocha, fronte ao Ministerio de Agricultura, en Madrid. Son os datos da convocatoria lanzada polas organizacións profesionais agrarias, APAG Extremadura Asaja, UPA-UCE, Asaja Cáceres, COAG e Cooperativas Agroalimentarias de España para reclamar medidas que palíen os problemas que os apicultores están a ter para exercer a súa actividade de xeito sustentable. Unha mobilización que Unións Agrarias secunda, e na que estarán presentes os produtores de mel de Galicia.
A convocatoria xurde da mala situación á que se enfrontan os apicultores de todo o estado. Unha situación que se ten ido agravando paulatinamente debido á falta de medidas por parte das administración, ou pola súa ineficacia e ineficiencia. Así as cousas, UUAA desprazarase o vindeiro martes ata Madrid para solicitar que de xeito urxente se adopten medidas concretas que aseguren que as familias que viven da apicultura poidan seguir exercendo o seu traballo de maneira digna e con garantías de futuro. Os prezos baixos, a varroa ou os problemas co etiquetado centran as principais reivindicacións.
En concreto, o sector apícola reclama:
- No relativo al mercado, medidas efectivas que reequilibren a cadea de valor do mel e os prodtos apícolas e que aseguren a sustentabilidade das familias que viven da apicultura. Tamén unha revisión urxente da política de acordos comerciais que garantice que o mel importado cumpre con todos os requisitos produtivos, sociais e medioambientais esixidos a un apicultor do noso país. Os productos apícolas, entre eles o mel e o polen, non poden ser empregados como moeda de cambio nos acordos comerciais que se establezan a nivel europeo.
- Un etiquetado que inclúa o listado de países de orixe, así como a porcentaxe de mestura de cada un.
- En materia de sanidade, considérase imprescindible a creación dun grupo de traballo específico sobre Varroa que se reúna periodicamente a nivel estatal e que mellore a coordinación entre as distintas administracións en materia sanitaria, ademais de apoiar a investigación para o desenvolvemento de novos principios activos contra a Varroa.
- Outro aspecto destacado é o relativo á falta de espazo para asentamentos apícolas, polo que se pide que se poida valorar a utilización de espazos públicos, ademais de regular distancias mínimas entre colmeares, entre outras.
- Respecto á PAC, considérase imprescindible o mantemento e reforzo do orzamento estatal e das distintas comunidades autónomas destinado a axudas ao sector apícola.
- Outro dos puntos incluídos é o relativo á adaptación ao cambio climático. Nese senso, as organizacións convocantes reclaman que se realicen análises da vulnerabilidade da apicultura, a definición de sistemas de indicadores de impacto e medidas para reducir as vulnerabilidades detectadas.
- Unha estratexia nacional coordinada fronte á ameaza das especies invasoras e depredadoras das abellas.
- Unha liña de seguro acorde ás necesidades do sector e vinculada á apicultura.