Que precisa o noso sector apícola? No Día Mundial das Abellas, lembramos as principais necesidades:
- No relativo ao mercado, medidas efectivas que reequilibren a cadea de valor do mel e os produtos apícolas e que aseguren a sustentabilidade das familias que viven da apicultura. Tamén unha revisión urxente da política de acordos comerciais que garantice que o mel importado cumpre con todos os requisitos produtivos, sociais e medioambientais esixidos a un apicultor do noso país. Os productos apícolas, entre eles o mel e o polen, non poden ser empregados como moeda de cambio nos acordos comerciais que se establezan a nivel europeo.
- Un etiquetado que inclúa o listado de países de orixe, así como a porcentaxe de mestura de cada un.
- En materia de sanidade, considérase imprescindible a creación dun grupo de traballo específico sobre Varroa que se reúna periodicamente a nivel estatal e que mellore a coordinación entre as distintas administracións en materia sanitaria, ademais de apoiar a investigación para o desenvolvemento de novos principios activos contra a Varroa.
- Outro aspecto destacado é o relativo á falta de espazo para asentamentos apícolas, polo que se pide que se poida valorar a utilización de espazos públicos, ademais de regular distancias mínimas entre colmeares, entre outras.
- Respecto á PAC, considérase imprescindible o mantemento e reforzo do orzamento estatal e das distintas comunidades autónomas destinado a axudas ao sector apícola.
- Outro dos puntos incluídos é o relativo á adaptación ao cambio climático. É necesario realizar análises da vulnerabilidade da apicultura, definir sistemas de indicadores de impacto e medidas para reducir as vulnerabilidades detectadas.
- Unha estratexia nacional coordinada fronte á ameaza das especies invasoras e depredadoras das abellas.
- Unha liña de seguro acorde ás necesidades do sector e vinculada á apicultura.
