Santiago 30 de xullo de 2020.- Unións Agrarias vixiará de preto o cumprimento íntegro dos acordos acadados nas Mesas da Carne para que as subas nas cotizacións anunciadas desde a IXP Ternera Gallega cheguen efectivamente ás rendas dos gandeiros. A organización agraria lembra que este compromiso foi chave á hora de pechar a campaña de mobilizacións realizadas hai semanas en distintas localidades de Galicia, e anuncia a súa intención de velar por facelo efectivo.
UUAA entende que os prezos deben recuperarse a valores anteriores aos efectos da Covid-19 nos mercados gandeiros. Así, para becerros de Ternera Gallega Suprema de ata 225 quilos, o prezo de Q/canal debe acadar os 4,75 Euros.
Ademais, Unións Agrarias volve advertir da necesidade de que as cotizacións se fagan públicas; e insiste en que éstas deben verse reflexadas en contrato para ser cumpridas efectivamente. Neste sentido, lémbralle á Consellería do Medio Rural a necesidade de poñer en marcha o observatorio de prezos para poder estabilizar os mercados; dado que neste momento, e a pesar das recuperacións logradas, non se acadan aínda os custes de produción. Nesa liña, a organización destaca que non existe neste momento ningunha razón de consumo, dada a case total reapertura da hostalería, para que os gandeiros sigan percibindo prezos de miseria como os que ata agora se viñan pagando polos becerros.