UUAA insta á Xunta a vincular as axudas ás adegas á existencia de contratos cos viticultores

Unións Agrarias solicita a complicidade da Xunta de Galicia para impulsar un novo marco que dote de estabilidade e garantías ás relacións entre viticultores e adegas. Foi a petición que a organización lanzou hoxe, tras dar a coñecer os datos dunha vendima “histórica” na que, a pesar das excelentes condicións da colleita e da alta demanda existente, os antigos problemas do sector volveron repetirse.

Con 73 millóns de quilos de uva entregada por 10.600 viticultores e que lles suporán máis de 223 millóns de euros, a campaña que ven de rematar marca un fito no sector vitivinícola galego; que rexistrou incrementos de prezos na uva entregada tanto en Rías Baixas como no Ribeiro e, á espera de confirmación, semella que tamén en Valdeorras. Porén, a entrega de uva ás adegas sen contratos de abastecemento asinados e cun prezo fixado de maneira previa ao inicio da colleita volveu ser unha realidade xeralizada nesta campaña; coa excepción de Rías Baixas; onde esta esixencia si se cumpriu de maneira maioritaria.

“Pese a ser un ano histórico en canto ás condicións de colleita e a alta demanda existente non fomos quen de convencer ás adegas de sentar nunha mesa para negociar prezos e contratos de abastecemento de longa duración. O contrato homologado pactado a nivel estatal pola interprofesional non deixou de ser un mero desexo sen apenas aplicación práctica. O que pon de manifesto o que lle viñamos dicindo ao conselleiro: que as múltiples axudas que a Xunta destina ás adegas deben vincularse á esixencia deses contratos que aporten estabilidade ao sector. Algo que será beneficioso para os viticultores, pero tamén para as adegas”, explicou o secretario xeral de UUAA.

A organización entende que esta debe ser a última campaña na que os produtores de uva non conten coas garantías precisas. E incide na necesidade de que a Xunta de Galicia vincule a concesión de axudas públicas ao cumprimento deses requisitos. “Estamos a tempo de trasladar cara á vendima que ven dúas esixencias claras: que as axudas públicas ás adegas se condicionen á existneica de contratos homologados asinados, e que o prezo da uva sexa froito dunha negociación entre viticultores, os seus representantes e as adegas. E dado que pola vía do convencemento persoal non conseguimos ese obxectivo esiximos que se empregue a ferramenta das axudas públicas para forzar ese novo marco”.

Unións Agrarias aproveitou para loubar as modificacións que a presión exercida por esta organización dende Galicia e pola UPA a nivel estatal conseguiron introducir no texto da Lei de Cadea que neste momento enfronta o seu trámite no Senado. Nese senso, a UUAA lembra que o feito de que no futuro se teña en conta o valor da man de obra familiar e a do propio titular da explotación á hora de calcular os custos de produción é un logro da organización. “Algo que ata agora non se contemplaba, e que resultaba dramático en Galicia, cun modelo agrogandeiro baseado nas explotacións familiares”.

Asimesmo, a organización celebra tamén o veto que prohibirá ás cadeas de distribución empregar a venda a perdas como ferramenta de promoción. E a máis importante e que suporá un antes e un despois de cara á próxima vendima: que os contratos de abastecemento deberán estar rexistrados nunha instancia pública antes de que se inice a vendima.

Na xuntanza da súa Sectorial Vitivinícola celebrada este xoves Unións Agrarias acordou tamén solicitar unha “xuntanza urxente” ao conselleiro do Medio Rural. “Temos información de que se está a negociar cos Consellos Resguladores unha convocatoria electoral para marzo e estase sometendo a consulta a composición dos censos e a representación dos vogais. Información que as organización debemos coñecer e das que debemos participar. Entendemos que esa representación nos corresponde, e parece lóxico que sexamos escoitados”, indicou o secretario xeral de Unións.