Santiago, 16 de abril de 2025.- Unións Agrarias lamenta o xiro dado pola Xunta de Galicia no que ás súas relacións co sector produtor galego se refire. A organización amosa o seu asombro ante a exclusión dos representantes de agricultores e gandeiros da xuntanza convocada polo goberno galego para abordar os efectos e posibles solucións ante as consecuencias das novas políticas arancelarias. Un encontro no que, xunto aos conselleiros de Economía e Industria, Medio Rural, Facenda e Administración Pública e Mar, participaron representantes de máis dunha vintena de clústeres, asociacións sectoriais e Consellos Reguladores.
“A Xunta de Galicia debe pensar que as novas políticas arancelarias non van ter consecuencias para agricultores e gandeiros”, ironiza Unións Agrarias, que lamenta a estreitez de miras do goberno galego neste asunto.
A organización agrogandeira lamenta que a administración autonómica teña ignorado aos representantes do sector produtor, quitándolles voz e posibilidade de interlocución nun asunto que está moi lonxe de serlles alleo. Así as cousas, Unións Agrarias anima á Xunta de Galicia a cumprir co papel das organizacións agrogandeiras e a poñer couto aos posibles intentos de adegas e outras empresas agroalimentarias de repercutir a situación nas contas do elo máis baixo da cadea.
Unións Agrarias celebra o orzamento que a Xunta de Galicia ven de poñer sobre a mesa para axudar ás empresas a enfrontar o novo escenario que se abre trala suba de aranceis anunciada polos Estados Unidos. Unha actitude que, agarda, o goberno galego traslade tamén ao sector produtor á hora de prestarlle os apoios precisos para impulsar as accións necesarias para enfrontar as consecuencias desta crise, ou reconducir a situación derivada dos cambios de hábitos no consumo de viños que levan xa dous anos lastrando as vendas de uva tinta. Así as cousas, a organización anima á titular de Medio Rural a seguir o exemplo da súa homóloga de Economía e Industria, que trala xuntanza deste luns avogaba por traballar man a man cos sectores para que trasladen cales son as súas necesidades. “Está moi ben que se atendan as necesidades das empresas, pero tamén estaría ben que a Xunta de Galicia lembrara que detrás de cada empresa do sector agroalimentario se atopan centos de pequenos agricultores e gandeiros que non poden ser obviados nin excluídos”.
