Santiago 9 de setembro de 2025.- Unións Agrarias ven de solicitar á Consellería do Medio Rural que se flexibilice de xeito transitorio a normativa que rixe a produción ecolóxica, pola imposibilidade de cumprir coas ratios normativas que se fixan para a alimentación do gando. Xa o propio Regulamento Europeo establece a posibilidade de adoptar normas excepcionais de produción para permitir que a produción ecolóxica prosiga a súa actividade ou a renove en caso de circunstancias catastróficas.
A organización agraria lembra que a vaga de incendios que asolou gran parte da provincia de Ourense e outras comarcas de Galicia nas últimas semanas supuxo a perda da produción forraxeira de explotacións gandeiras e da superficie pecoreada polas abellas. O nivel de perda foi tan elevado, nalgúns casos a totalidade da superficie propia, que a Consellería do Medio Rural dispuxo un dispositivo de emerxencia para garantir a subministración inmediata de alimento para os animais das explotacións gandeiras afectadas polos incendios forestais.
As prácticas e métodos de agricultura ecolóxica establecidas tanto no Regulamento (UE) nº 2018/848 do Parlamento Europeo e do Consello, sobre produción ecolóxica e etiquetaxe dos produtos ecolóxicos, así como as técnicas específicas sobre produción ecolóxica, establecen uns requisitos en canto a alimentación das gandarías: que procedan da propia explotación nun 70%, que o restante proceda doutras unidades ecolóxicas ou en conversión da mesma rexión ou que os animais teñan acceso a pasteiros para pastar, e das explotacións apícolas: non se permite a alimentación artificial das colonias. Neste contexto, as explotacións inscritas no CRAEGA con teñen serias dificultades para abastecerse neste momento de alimentación ecolóxica, atópanse nun camiño sen saída dado que o incumprimento da normativa implica a perda da certificación no CRAEGA e ademais dos compromisos e requisitos da PAC referidos a xestión agroambiental en agricultura ecolóxica.
