O proxecto Farm Digital Assistant (FDA) ten como obxectivo principal reducir a crecente burocracia dixital e a fenda dixital no sector agropecuario. Nos últimos anos, os gandeiros e agricultores víronse obrigados a realizar un número crecente de trámites a través de plataformas dixitais, o que complica o seu traballo, especialmente tendo en conta o avellentamento do sector.

Para dar resposta a esta problemática, o proxecto propón o desenvolvemento dunha plataforma integral e centralizada que permita a xestión de todos os trámites administrativos de forma personalizada. A plataforma estará adaptada ás necesidades específicas de cada usuario, xa sexa gandeiro de leite, de carne, ou propietario forestal, e proporcionará acceso directo aos servizos administrativos que necesiten de forma habitual.

Un dos piares do proxecto é a implementación dun asistente virtual, que guiará aos usuarios a través dos procesos administrativos dixitais, dirixíndoos aos trámites ou documentos necesarios en cada momento. Este asistente tamén resolverá as dúbidas máis frecuentes sobre trámites e convocatorias, reducindo así a complexidade administrativa á que se enfrontan os produtores. Ademais, a ferramenta contará cun sistema de notificacións mediante plataformas como Telegram, para enviar documentación e avisos importantes de forma rápida e directa.

A plataforma tamén incluirá unha sección informativa, que ofrecerá aos usuarios noticias de interese sobre o sector agropecuario, novas normativas ou información relevante sobre cuestións ambientais e tecnolóxicas. Así, facilitarase o acceso á información máis recente e útil para o día a día dos produtores.

A través do FDA, non só se busca mellorar a xestión administrativa, senón tamén contribuír á redución da fenda dixital entre o rural e o urbano, empoderando aos gandeiros e agricultores mediante o uso de tecnoloxías que optimicen os seus procesos.